(Update) CAGAYAN DE ORO CITY – Nadakpan na sa mga operatiba sa Cogon Police Station ang usa sa duha ka suspek nga mipusil-patay sa ‘police asset’ sa Tangkongan,Sitio Pinikitan,Brgy Camaman-an ning syudad kaganihang kadlawon.
Kini human nagbunga sa positibong resulta ang follow up operation nga gihimo sa kapolisan aron makasuhan ang mga suspek pagpatay sa biktima nga si Henry Pimentel alyas Opaw ,43 anyos,bulag sa asawa nga taga-Brgy Macasandig sa syudad.
Sulti ni Cogon Police Station commander Major Sabido Labitad nga gipugngan una nila ang paglugwa sa pangalan sa dinakpan aron dili mabalda ang dugang operasyon sa ilang mga operatiba sa utok sa kremin.
Si Pimentel nga ilado nga police asset ang gika-komosyon pa sa mga suspek diin siya nakadagan pa sa pila ka metros ayha naigo sa pagpusil sa makaupat ka higayon hinungdan sa kamatayon niini.
Nagtoo si Labitad nga dili usab molayo sa anggulo sa ilegal nga droga kung nganong gihinusan sa kinabuhi ang biktima.
