Giklaro ni Task Force Kinaiyahan Chairman Orlando R. Ravanera nga dili tinuod ang pasangil nga anti-development sila tungod kay ang ilang baruganan nakapunting lamang sa pagpadayon sa orihinal nga mga pagtulun-an sa mga misyonaryo nga pari sa Xavier Univeristy.
Gipahinumdoman niya ang komunidad sa Xavier University nga ang eskwelahan gitukod aron mag-alagad sa mga kabos pinaagi sa prinsipyo nga “men and women for others”.
Apan karon, gisaway niya ang giingong pag-usab sa prayoridad sa unibersidad nga daw mas nakapokus na karon sa pagpangita og dakong kita pinaagi planong paggamit sa yuta niini sa pagpatukod og mixed-use commercial ug residential hub inay nga sa pagserbisyo sa katawhan.
Nunot niini, gipahibalo niya nga magpahigayon sila og rally karong bulan sa Hunyo uban ang mga lumad ug mga alumni sa XU aron ipadayag ang ilang dakong pagsupak sa maong direksyon.
