Gikatakdang dagsaon sa pipila ka grupo sa mga taxi driver ang buhatan sa LTFRB Region 10 karong umaabot nga Lunes. Kini isip protesta sa wala pa mahatag nga fuel subsidy ug sa giingong “kakuwang” sa kantidad nga nadawat sa pipila ka drayber.
Gisaway sa maong sektor ang ahensya human migawas nga ₱1,500 lamang ang nadawat sa uban layo ra sa unang gisaad sa gobyerno nga mokantidad sa ₱5,000.
Subay sa pinakaulahing datos, anaa pa lamang sa 281 ka mga drayber ang nakakuha sa maong ayuda.
Samtang, nagpabiling “zero balance” ang uban, lakip na ang mga operator nga wala pa gyud makadawat bisan usa ka dako sukad sa paglusad sa programa.
Gikumpara usab sa grupo ang matud pa “hinay” nga proseso sa LTFRB-10 kung itandi sa paspas nga pagpanghatag og hinabang sa lokal nga kagamhanan sa Cagayan de Oro ngadto sa mga motorela drayber.
Tungod niini, hugot nga gipangayo sa maong sektor ang dinaliang katin-awan ug paspas nga aksyon gikan sa gobyerno aron mahupay ang ilang mulo taliwala sa walay hunong nga pagsaka sa presyo sa lana. (jane mae abulag)
