Nagmalampuson ang Northern Mindanao Chess team sa pag-uli nga dunay dala nga medalya bisan paman sa grabeng kompetisyon nga ilang nasugatan sa bag-ohay lang nga Palarong Pambansa.
Sumala ni Coach Engr. Christy Abesamis, nakasinati sila og dakong hagit tungod kay mga titled player ug sakop sa national team ang ilang mga nakontra sa secondary girls category.
Bisan paman wala nakakuha og bulawan nga medalya, mapasalamaton gihapon ang ilang kampo tungod sa taas nga lebel sa kahanas nga gipakita sa mga atleta.
Gikumpirma usab sa coach nga ang mga atleta sa Team Northern Mindanao Chess modayon usab sa National Tournament karong umaabot nga Hunyo 3 hangtod 7.
Sa katapusan, nagbilin og pahimangno si Coach Abesamis sa mga atleta nga magpadayon lang sa pagkat-on ug dili mawad-an og paglaum bisan pa man adunay mga kapakyasan nga masugatan.
