CAGAYAN DE ORO CITY – Gikompirma sa grupo sa NCTU nga dili sila mosalmot sa unom ka adlaw nga nationwide transport strike sugod karong adlaw’ng Lunes.
Kini ang gibutyag ni Joel Gabatan, leader sa NCTU-Northern Mindanao human ang ilang panagtigom nga gihimo sa miaging gabii.
Gibutyag ni Gabatan nga mayoriya sa mga miembro ug opisyal sa grupo sa mga driver ug operator dinhi sa rehiyon ang mipabor sa pagpadayon sa ilang pagpamasada.
Hinoon, gi-angkon ni Gabatan nga gamay lamang sa ilang mga miembro ang mitambong sa maong katiguman. Ang grupong Piston ug Manibila sa kauluhan ang mangulo sa maong transport strike agi’g pagpakita sa ilang pagsupak sa PUJ modernization program sa kagamhanan.
Samtang gikompirma usab sa Northern Mindanao Federation of Transport Cooperative kon Norminfed nga dili sila mosalmot sa transport strike karong adlaw’ng Lunes.
Gibutyag ni Melvin Erederos, chairperson sa maong grupo nga suportado nila ang mga balaod nga gipatuman sa DOTr ug LTFRB nga modernization sa PUJs.
Namahayag si Erederos nga dakong supak sila sa ipahigayong transport strike tungod kay ang mga sumasakay ilabina ang mga estudyantye ang ma-apektohan niini.
Dugang pa niini nga dunay panagtigom nga himuon ang 40 ka transport cooperatives sa rehiyon 10 karong adlaw’ng Lunes dinhi sa syudad.
Gibatikos usab niini ang gropong nagpasi-ugda sa maong nationwide transport strike nga naka-base sa kauluhan.
