Gipahibalo ni U.S. President Donald Trump nga adunay na silay konsepto alang sa usa ka bag-ong kasabutan sa pamatigayon tali sa Estados Unidos ug Canada human sa iyang panaghisgut kang Canadian Prime Minister Mark Carney.
Gihulagway ni Carney nga positibo ug mapuslanon ang ilang panag-istoryahanay ug miingon nga magpadayon ang mga grupo sa negosasyon sa duha ka nasud sa umaabot nga mga semana aron makab-ot ang usa ka kasabutan nga makamugna og trabaho, makapauswag sa kahimtang sa panginabuhi ug motahud sa pinulongan, kultura ug soberanya sa Canada.
Lakip sa mga gihisgutang bahin sa posibleng kasabutan ang pagbanhaw sa proyekto sa Keystone XL pipeline, diin si Trump miingon nga ang Canada maoy motukod ug mogasto niini, apan wala pa maklaro kon unsaon pagpadayon pag-usab sa gikansela nga proyekto.
Nahitabo ang maong mga panaghisgut taliwala sa nagpadayon nga panaglalis sa pamatigayon ug pagpatuman sa mga taripa sa duha ka nasud, pipila lamang ka adlaw sa dili pa ang midterm elections sa Estados Unidos. (raniel mahunyag)
