Mitambong si United Nationas Secretary General Antonio Guterres sa ika-80 nga anibersaryo sa International Court of Justice (ICJ) sa The Hague Netherlands.
Lakip sa iyang panawagan ang pag-obserbar sa “rule of law”, inay maghinawod sa paggamit sa gahum ug kusog aron makuha ang tumong.
Gipamugos sa hepe sa UN nga pinaagi sa paggamit sa gahum, taas ang tsansa nga mawad-an sa kontrol ang tawo.
Lakip sa gi-highlight ni Guterres ang daghang paglapas sa internasyonal nga balaod nga makita karon.
Nagpasidaan kini sa posibleng pagluya sa internasyonal nga balaod tungod sa huyang sa pundasyon ug mismo ang mga dagkung lideres ang nagpakilid niini.
Ang presidente sa ICJ nga si Iwasawa Yuji misuporta panawagan sa UN Chief, dungan sa pagpabati sa iyang kabalaka ug nag-ingon nga daghan na karon ang dili gasunod sa obligasyon ug nagpakita sa pagduhaduha sa multilateralismo.
Ang ICJ, nga natukod niadtong 1945 ug nahimutang sa Peace Palace sa The Hague, mao ang labing taas nga korte sa UN nga naghatag og dalan sa mga nasud sa pagresolba sa panagbangi nga walay gubat.
