CAGAYAN DE ORO CITY – Direktang gihimakak ni Misamis Oriental Gov. Peter Unabia nga dili niya banggaon si incumbent City Mayor Rolando ‘Klarex’ Uy sa sunod nga local elections dinhi sa syudad.
Kini human kompirmaha sa gobernador nga nangandam na sila aron pasudlan sa ilang linya sa politika ang syudad sa 2025 elections.
Gihimo ni Unabia ang katin-awan nunot sa iyang pagpaila kanila ni Misamis Oriental Sangguniang Panlalawigan Board Members Gregorio Sabal III,Wayne Militante,PDRRMO head Fernando Dy Jr ug naa pa’y wala panganli nga usa diin sila nagbalhin na sa ilang vote registration sa syudad kagahapong adlawa.
Namahayag si Unabia nga sa pagkakaron,pabiling si Mayor Klarex ang iyang suportahan ilabina nga dugay na sila nga higala sukad sa panahon nga managsama pa sila nga kongresista sa syudad ug lalawigan.
Gipasalig usab sa gobernador nga dili hataga’g labad sa ulo ang puno-puno nga political lineup ni Klarex alang sa 2025 elections sa syudad.
Kini bisan kon dunay upat ka kandidato nga pasudlon si Unabia sa pagka-kagawad sa una ug ikaduhang distrito sa dakbayan sunod tuig.
Miingon ang gobernador nga magsilbing independent na lamang ang iyang mga kandidato apan mi-komedya kini kang Mayor Klarex nga unta dili ‘vote straight’ campaign ang ilang grupo aron makadaug usab ang gikan sa team PAGLAUM.
