CAGAYAN DE ORO CITY – Gikadismaya ni Misamis Oriental Provincial Gov Peter ‘Senior Pedro’ Unabia ang negatibong ‘feedbacks’ kabahin sa dili maayong taras sa pipila ka empleyado ubos sa kapitolyo probinsyal ngadto sa mga kliyente o katawhan sa lalawigan.
Kini ang rason nga tukuron sa gobernador ang provincial hotline aron direktang makasumbong ngadto kaniya ang mga magbubuhis sa probinsya nga wala ayuha’g pagtagad sa pipila ka empleyado niini.
Gibutyag sa gobernador nga ihinayon usab niini ang pagpatuman sa ‘rightsizing’ sa provincial govt aron mas klaro ang mga trabahante nga angayang lamang hataga’g suhulan sa buhis sa katawhan.
Pagpasabot sa gobernador nga ang maong lakang ang naka-linya usab sa palisya ni Pres Bongbong Marcos nga klaruhon kadtong mga buhatan sa gobierno nga dunay klaro nga trabaho ug likayan ang pag-doble-doble sa mga empleyado aron makadaginot sa panalapi sa estado.
Hisayrang sa panahon usab ni kanhi gobernador ug karon 2nd District Congressman Bambi Emano,gipatuman niini ang istrikto nga palisya nga magtinarong sa ilang mga trabaho ang mga trabahante ug tagdo’g maayo ang mga kliyente nga gadangop sa kapitolyo probinsyal sulod sa siyam ka tuig.
