CAGAYAN DE ORO CITY – Gi-depensa ni Misamis Oriental Gov. Peter Unabia ang paghatag suporta sa liderato ug mga programa ni City Mayor Rolando ‘Klarex’ Uy sa dakbayan.
Kini bisan kon sila ni Misamis Oriental District 2 Cong. Bambi Emano ang dunay lig-ong alyansa sa politika sa milabay’ng May 2022 elections sa lalawigan.
Gihimo ni Unabia ang pag-esplikar kon unsay mahitabo sa Padayon Pilipino-Paglaum alliance nga ipasudlod na niini sa upat ka umaabot kandidato pagka-konsehal ang syudad aron magsilbing tulay tali sa mga programa usab sa lalawigan kon pananglitan mangdaug sa 2025 elections.
Pamugos sa gobernador nga ang pagsuporta sa development agenda ni Klarex ang wala nagkahulugan nga magka-political alliance na sila.
Namahayag si Unabia nga wala mausab ang alyansa nila ni Emano apan dili usab angay masakripisyo ang interes sa katawhan sa lalawigan kon paluyuhan niini ang pamunuan ni Uy nga dugay na niyang suod usab nga higala.
Siya miingon nga sa wala pa niya himua ang pag-presentar sa potential candidates alang sa syudad,wala kini matago kang Emano ug bisan sa iyang anak nga si MisOr 1st District Congressman Christian Unabia.
Una nang gihimakak ni Unabia nga preparasyon kini sa iyang politikanhong interes alang sa pagsulod sa dakbayan.
Sa pikas bahin,wala mipasalig ug nagdumili usab pagbalibad si City Mayor Rolando ‘Klarex’ Uy kabahin sa pagpasulod ni Unabia sa upat ka kandidato pagka-konsehal sa syudad sa 2025 elections.
Miingon si Uy nga dugay nang nagpasumbingay si Unabia kabahin niini apan wala pa’y pormal nga paghisgot nila niini.
Apan miklaro ang mayor nga duna kini barometro o sukdanan kon kinsa ug unsa nga mga klase sa mga kandidato ang gusto niya ikauban sa iyang line-up alang sa subli pagpali pagka-mayor sa piliay sunod tuig.
Apil sa gustong magpapili sa pagka-konsehal sila MisOr-SP board members Gerardo Sabal III,Wayne Militante,PDRRMO head Fernando ‘Sotsot’ Dy Jr ug naa pa’y usa nga gi-finalize pa ni Unabia.
Hisayrang sa miaging interbyu kang Emano,daan na usab kining misulti nga suportado niini ang plano ni Unabia nga ipadagan sila Sabal ug Militante pagka-konsehal sa syudad 2025 polls.
