Gisalikway sa model/actress ug US First Lady Melania Trump ang pasangil nga aduna siyay koneksyon sa namatay nga sex offender ug child trafficker nga si Jeffrey Epstein.
Gibu-ak ni Melania ang iyang pagpakahilom human gisakyan na sa pagpamulitika ang isyu kaniya ug kang Epstein gamit ang mga narekober nga file sa namatay.
Sa iyang pamahayag sa White House, si Melania miingon nga pulos mga bakak ang mga nagdugtong nga iskandalo batok kaniya ug kinahanglan matapos na ang maong isyu.
Gisaway niini ang mga tawong nagdagmal kaniya ug gitawag nga walay mga etika ug dili matinahuron.
Iyang klarong gisulti nga wala siya’y relasyon o nahibaluan sa mga krimen ni Epstein ug sa iyang kauban nga si Ghislaine Maxwell.
Gipangayo usab niya sa Kongreso nga magpahigayon sa pampublikong hearing aron hatagan sa tingog ang mga biktima ni Epstein.
