Gisunog sa mga awtoridad sa Cambodia ang 11,000 libras o lima ka tonelada nga mga ilegal nga droga, nga kasagaran MDMA ug methamphetamine, atol sa usa ka pampublikong seremonya sa lalawigan sa Kandal.
Nagkantidad og halos 500 milyones US dollars ang maong kontrabando, diin nakumpiska kini gikan sa nagkalainlaing operasyon niadtong 2025 sa mga lalawigan sa Kandal, Kampong Chhnang, ug sa ulohang dakbayan nga Phnom Penh.
Namugos ang mga opisyal nga kon wala masakmit ang maong dakong gidaghanon sa drugas, mamahimo unta kining makadaot ug makapahimutang sa peligro sa milyon-milyong katawhan.
Naghatag usab og pahinumdom si Prime Minister Hun Manet ngadto sa mga batan-on nga likayan ang droga ug magpokus sa ilang panlawas ug edukasyon. (riza budlao)
