CAGAYAN DE ORO CITY – Nakit-an na ang 15 anyos nga lalaki nga unang nalumos samtang nanguha’g kawayan aron gamiton nga paghimo’g proyekto sa tunghaan sa relocation site sa Brgy Pagatpat ning syudad.
Miingon si Police Master Sgt Senador Ostero sa Bulua Police Station nga giila ang biktima nga si Ronald Binalayo nga nagpuyo sa maong lugar.
Nagtoo si Ostero nga posibleng nahulog daplin sa sapa diin dunay gipahigayon nga quarry operation hinungdan nalumos ang biktima niadtong adlaw’ng Domingo.
Nakabaton sa pipila ka samad ang ulo ug lawas sa biktima dihang nakit-an kini sa usa ka residente sa suba sa Iponan ning syudad.
Samtang, gikakurat pag-ayo sa pamilya sa tinun-an nga unang na missing human nalumos ug nakit-an sa pipila ka residente sa Iponan river ning syudad.
Miingon si Rommel Benalayo kinsa amahan sa biktima nga nananghid lamang kini sa iyang inahan nga manguha’g materyales alang sa school project dihang nalumos sa suba sa miaging adlaw’ng Domingo sa buntag.
Hinoon,kumbinsido ang magtiayong Benalayo nga walay foul play sa kamatayon sa ilang anak gumikan sa hitabo.
