Gilusad sa puwersa sa Russia ang usa sa labing dako nga pag-atake sa gubat pinaagi sa ginatos ka mga drone ug missiles nga mihapak sa kapital sa Ukraine nga Kyiv.
Labing menos 21 ka tawo ang nakalas, samtang kapin sa 50 ka uban pa ang nangaangol ug gibanabanang 130 ka mga edipisyo o building ang nangadaot sa maong pagpabuto.
Tungod sa maong trahedya, daling nipauli si Presidente Volodymyr Zelenskiy gikan sa iyang biyahe sa Ireland ug iyang gisaway ang mga kaalyadong nasod tungod sa kalangan sa paghatod sa mga air defense systems.
Sumala sa Air Force sa Ukraine, nalisdan sila sa pag-intercept sa mga missile tungod sa kakuwang sa suplay sa mga Patriot missile sa milabayng mga bulan.
Sa pikas bahin, gipahayag sa Ministry of Defence sa Russia nga ang maong “massive attack” gihimo isip bawos sa giingong mga pag-atake usab sa drone sa Ukraine ngadto sa ilang nasod.
