Labi-labi ang pagpasalamat sa 24 ka mga Pilipino nga nakabalik sa nasud human sa pipila ka bulan nga pagkapriso sa Russia.
Pinaagi sa negosasyon tali ni Presidente Ferdinand Marcos Jr ug Russian President Vladimir Putin, hingpit nga nakabalik sa nasud Pilipinas ang mga Overseas Filipino Workers (OWFs) nga nadetinar sulod sa siyam ka bulan sa maong nasud.
Gibutyag sa Department of Foreign Affairs (DFA), unang miabot sa Ninoy Aquino International Airport (NAIA) ang unom ka Pilipino bandang alas-12 sa tungang gabii, ug misunod ang 18 pa bandang alas-3:50 sa kaadlawon.
Gisugat sila sa mga opisyales sa DFA nga gipangulohan ni Foreign Affairs Secretary Ma. Theresa Lazaro.
Unang namahayag si Lazaro nga kining unang batch nga naka-uli pulos na priso tungod sa immigration issues ug giingon nga nabiktima sila sa illegal recruitment.
Namahayag ang DFA nga personal nga gihangyo ni Presidente Marcos ang ilang kaso kang Putin sa bilateral meeting sa Kazan niadtong Hunyo 17, diin gipayag sa presidente ang dakong kabalaka sa kahimtang sa mga pinoy.
Unang mitubag si Putin nga wala siya nahibalo sa sitwasyon, apan human sa pagsusi, natultulan sa mga awtoridad ang mga Pilipino ug napamatud-an nga wala silay kaso nga giatubang.
Tungod niini, dali nga giaksyonan sa Russian authorities ang ilang pagpagawas niadtong Hunyo 19, nga maoy mitapos sa ilang pipila ka bulan nga pagkapriso.
