Giaghat sa Oro Chamber ang mga negosyante, mamumuhunan ug mga opisyal sa gobyerno nga motambong sa 35th Mindanao Business Conference nga pagahimoon sa Cagayan de Oro City gikan Agosto 11 hangtod 13.
Hisayran nga ikaunom na kini nga higayon nga ang Oro Chamber maoy mag-host sa maong komperensya, nga giila isip usa sa labing dagkong business gatherings sa Mindanao.
Sa eksklusibong interview sa Bombo Radyo, gibutyag ni Oro Chamber President Engr. Almarico Brito nga personal nilang gihatag ang imbitasyon kang First Lady Liza Araneta-Marcos atol sa iyang pagbisita sa siyudad ubos sa LAB for All program, ug naglaum usab sila nga makatambong si Pangulong Ferdinand Marcos Jr.
Matod ni Brito, sa mga miaging Mindanao Business Conference nga gihost sa Oro Chamber, mitambong usab ang kanhi mga Presidente nga sila Fidel V. Ramos, Gloria Macapagal-Arroyo, ug Rodrigo Roa Duterte.
Gilauman nga mapundok sa maong komperensya ang mga lider sa negosyo, mga investor ug mga opisyal sa gobyerno aron hisgutan ang mga oportunidad sa pamuhunan ug mga pamaagi sa pagpalambo sa ekonomiya sa Mindanao (JANE ABULAG)
