“Gasa sa Kagahapon, Garbo karon”. Kini maoy tema sa ika 76 ka tuig nga anibersaryo sa Karta ning syudad o “Charter Day Celebration”.
Namahayag si Cagayan de Oro Vice Mayor Jocelyn Bebot Rodriguez nga pagdumdum sa kagahapon, naghatag sa mabulawanon nga pagtulun-an, samtang mapasigarbohon ang syudad sa pag-angkon sa kalampusan sa pagkakaron.
Kuyog niini ang mahayag nga kaugmaon nga naghatag sa dalan padulong sa ti-unay nga kalambuan. Insakto ning adlawa, kapin 70 ka tuig na ang nakalabay dihang naningkamot ang mga kadagkuan sa syudad aron ma-angkon ang kaugalignan sa syudad ubos sa Republic Act 521, pinaagi ni Kongresista Pedro Baculio ug Emmanuel Pelaez.
Silang duruha maoy misumpay sa pinulungang “de oro” gikan sa Cagayan de Misamis.
Ning tuiga usab giselebrar sa syudad ang ika 400 ka tuig sa founding anniversary sa syudad niadtong 1626.
Iya usab giila ang 40 ka tuig nga pagpaningkamot sa iyang igsoon nga si 2nd District Representative Rufus Rodriguez sa pagsulat sa kasaysayan sa syudad ug daku kini nga kontribusyon sa pag-ila sa kagahapon sa dakbayan.
