Nakab-ot sa Police Regional Office 10 ang pinakadakung kalampusan sa pagsanta sa Illegal nga druga, subay sa unom ka bulan nga kampanya sa kapulisan sa tibook Northern Mindanao.
Namahayag si PRO-10 Regional Director PBGEN Christopher Abrahano ang operational accomplishments sa PRO-10 gikan Enero hangtod Hunyo, misumada sa 1,641 ka operasyon ang gipahigayon kundiin, 1,908 ka indibidwal ang nadakpan sa kapolisan.
Mokabat sa labaw 20 ka kilo nga shabu ug 3.5 ka kilo nga marijuana ang nasakmit. Kini nga mga ilegal nga druga mukantidad sa gibana-bana kapin ₱137 milyon ubos sa standard drug price.
Lakip sa mga dagkong operasyon mao ang pagdakop sa mga suspek nga nakuhaan sa labaw ₱35 milyon nga shabu sa Cagayan de Oro City, ₱13.8 milyon sa lalawigan sa Bukidnon, ug dugang ₱13.8 milyon sa Barangay Puerto, Cagayan de Oro City.
