Mokabat sa 60,000 ka mga tawo ang gipabakwit ubos sa mandatory evacuation sa Spokane, Washington, tungod sa paspas nga pagkatag sa dagkong wildfires.
Giaghat sa mga otoridad ang mga residente nga biyaan dayon ang ilang mga panimalay samtang ang mga bumbero naglisod sa pagpakigbatok sa kalayo tungod sa baga nga aso ug kusog nga hangin.
Gikumpirma sa mga opisyal nga kapin sa 600 ka mga estruktura, lakip ang mga balay ug uban pang mga bilding, ang nalamoy o naguba sa kalayo.
Gihulagway ni Spokane Mayor Lisa Brown ang maong insidente isip usa sa pinakagrabeng natural nga kalamidad nga nakaigo sa ilang rehiyon.
Padayon ang paningkamot sa mga otoridad sa pagpugong sa dugang pang pagkatag sa sunog ug sa pagsiguro sa kaluwasan sa mga residente.
