CAGAYAN DE ORO CITY-Gireklamo sa mga residente ang naputol nga mga water hose sa Brgy Macabalan ning syudad.
Matud ni Macabalan Brgy Kap Norbel Saa nga bisan mibalik na ang suplay sa tubig, pabilin gihapon nga walay agas sa ilang brgy tungod kay gipangputol sa mga residente ang hose.
Asoy pa niini nga napugos ang mga residente nga putlon ang hose tungod sa hinay nga suplay sa tubig sa miaging adlaw human maapektuhan ang serbisyo sa Cagayan de Oro Water District o COWD sa bagyong Vinta.
Samtang gipasalig ni COWD Gen Mngr Engr Rachel Beja nga ilang tul-iron ang mga water hose nga naputol sa Brgy Macabalan karong adlawa.
Si Beja miingon nga maoy ilang prayoridad karon pagtul-id ang mga naputol nga water hose.
Gani, gibutyag niini nga iya nang gimanduan ang mga sakop nga liboton ang tibook syudad aron lantawon ang mga problema niini sa tubig.
Nanawagan usab si Beja sa publiko nga likayan na ang pagpamutol sa mga hose aron dili madugangan ang problema sa kakulangon sa tubig.
Nangayo usab ug pasaylo si Beja tungod kay dili pa tanang barangay ang nakasinati sa maayo nga suplay sa tubig.
Matud ni Beja nga pipila ka mga lugar sa Barangay Macasandig ug Camaman-an ang wala pay suplay sa tubig tungod kay nagpadayon pa ang ilang pagtul-id sa mga nadaut nga linya.
Apan bisan paman niini, gibutyag ni Beja nga naa gihapoy suplay sa tubig sa maong mga lugar panahon sa kagabion.
