CAGAYAN DE ORO CITY-Gikalipay sa City Disaster Risk and Reduction Management Office o CDRRMO ang pagtipas ni bagyong Agaton hinungdan nga wala na kini miigo pa sa dakbayan.
Matud ni CDRRMO head retired army Col. Mario Verner Monsanto nga mapasalamaton sila tungod kay gidungog ang pag-ampo sa mga katawhan sa syudad hinungdan nga wala maapektuhi sa dautang panahon ang dakbayan.
Apan bisan paman niini, magpabiling alerto gihapon ang ahensiya sa posibilidad nga laing bagyo ang masinatian sa syudad.
Dugtong niini, naglaraw si Monsanto nga hinagboon ang tanang mga barangay kapitan aron pahibal-on sa ilang partisipasyon panahon sa kalamidad.
Samtang makigtagbo si Monsanto sa pamilya sa giingong na-missing tungod sa bagyong Vinta nga miigo sa syudad sa miaging semana.
Siya miingon nga gusto niya nga masayran ang kinatibuk-ang detalye sa pagkawala sa biktima ilabina nga gideklarar na sa syudad ang zero casualty.
Si Monsanto miingon nga nagduda siya sa kredibilidad sa maong report ilabina nga naabtan pa’g semana ayha gi-report ang pagka-missing sa upat ka tawo nga nagpuyo sa bukid nga bahin sa syudad.
