CAGAYAN DE ORO CITY-Nasikop na sa kapolisan ang responsable pagpabuto’g armas diin usa ka sibilyan ang naigo sa bukton atol sa pagsugat sa bag-ong tuig sa lungsod sa Tagolona,Misamis Oriental.
Giila ni Tagoloan Police Station commander C/Insp Albart Tare ang suspek nga si Roberto Gadian Jr,hingkod ang panuigon ug nagpuyo sa Purok 7,Brgy Casinglot sa maong lungsod.
Mismo ang kaila niini nga nga wala panganli ang naghatag impormasyon sa kapolisan hinungdan nga gilayong gilusad ang follow up operation diin nagresulta pagkasikop ni Gadian.
Una niini,naigo ang wala nga bukton sa biktima nga si Jerry Taculod,44 anyos,minyo samtang kuhaon unta niya ang iyang celphone charger mismo sulod sa ilang pinuy-anan.
Nasuta nga kalibre 38 nga armas ang gigamit ug giingong wanted person sa kasong pagpayuhot sa gidiling droga ang dinakpan nga suspek.
