CAGAYAN DE ORO CITY-Gi-depensa sa Sr Jesus Nazareno Parish kon nganong gibalik nila sa orihinal nga rota ang traslacion sa Black Nazarene ning syudad sa Enero 9 ning tuiga.
Gibutyag ni Fr Julius Clavero,kura paroko sa maong simbahan nga walay kalabutan ang bisan unsa nga politika sa maong lakang sukwahi sa pipila ka espekulasyon.
Miingon si Clavero nga manukad ang prosesyon gikan sa San Agustin Cathedral padulong Nazareno Parish aron mapakusog ang traslacion tradition ug religious significance sa kalihukan.
Nasayran nga napahimutang sa Pelaez Sports Center ang imahen sa Nazareno kay dili bakante ang Cathedral sa maong katuyuan sa mga tuig 2015 ngadto 2017.
Samtang subling gipadumdom sa kapolisan sa mga deboto ang pagpalupad sa drones,pagsul-ob kalo, pag-shades, pag-scarf ug pagdala-dala sa mahalong alahas atol sa traslaccion sa Itom nga Nazareno.
Gihimo ni C/Insp Mardi Hortillosa,tigpamaba sa Cagayan de Oro City Police Office o COCPO ang pasidaan sa tanang deboto nga mutambong sa prosesyon atol sa final security briefing sa CDRRMD office kagahapong adlawa.
Giawhag ni Hortillosa ang mga deboto nga tumanon lamang ang mga palisiya aron malikayan ang kagubot.
Miingon si Hortillosa nga gitinguha nila nga mahimong generally peaceful ang kapistahan sa Nazareno sa Enero 9.
Sa pikas bahin,ikatag usab sa incident management team o IMT ang medical personnel sa bisinidad sa San Agustin Cathedral padulong sa Sr Jesus Nazareno Parish atol sa piyesta sa Black Nazarene ning syudad sunod semana.
Kini sa pagsiguro nga gilayon maka-responde kon ugaling may mga deboto nga maglain ang ginhawa tungod sa gilaumang pagdagsa sa mga deboto.
Miingon si CDRRMD officer-in-charge Allan Porcadilla nga hugot usab ang ilang koordinasyon sa ubang rescue teams sa pagsiguro nga mahatagan sa seguridad ang publiko sa maong adlaw.
Hisayrang gilauman nga anaa sa 70 ngadto 80-mil ka deboto ang gilaumang modagsa atol sa traslacion sa Nazareno sunod semana.
