CAGAYAN DE ORO CITY-Gihupay ni City Mayor Oscar Moreno ang kabalaka sa katawhan nga siya subli na usab gipaubos sa dismissal order sa Ombudsman ning tuiga.
Miingon ang legal counsel ni Moreno nga si Atty Dale Brian Mordeno nga napugngan na sa Court of Appeals -Mindanao ang maong mando sa Ombudsman sa miaging tuig 2017.
Dugang ni Mordeno nga maoy tahas nila nga mapabasura ang pinaka-main case nga giduso sa Ombudsman batok kang Moreno.
Si Moreno kuyog ang laing tulo ka department heads sa provincial capitol ang gitangtang sa Ombudsman tungod sa pag-renta sa ekipo nga wala moagi sa public bidding sa tuig 2009 ug 2010.
Samtang namugos ang testigo sa mga kaso sa Ombudsman nga si Engr Antonio Nuniez Jr nga angay nang mohawa ni City Mayor Oscar Moreno sa puwesto sa city hall.
Kini tungod kay mihupas na ang gahom sa duha ka temporary restraining orders o TRO sa Court of Appeals-Mindanao.
Si Nuniez ang unang miakusar kang Moreno ug ubang ulo sa departmento sa kapitolyo kaniadto nga nakasupak sa anti-graft and corrupt practices act hinungdang gikasuhan niya kini sa Ombudsman.
