CAGAYAN DE ORO CITY-Gikasuhan na sa upat ka counts sa kidnapping ug serious illegal detention with murder ang doktor nga kanhi konektado diha sa Northern Mindanao Medical Center o NMMC ning syudad.
Kini human hatagi’g gimbug-aton ni Senior Assistant State Prosecutor Peter Ong ang mga testimonya sa kidnap victims nga kabahin ang suspek nga si Dr Russell Salic sa grupong Maute-ISIS nga mihimo’g pag-atake sa Marawi City niadtong Mayo 2017.
Kabahin sa mga biktima nga sila si Gabriel Permitis, Alfredo Cano-os, Adonis Mendez ug Julito Janubas diin mismo nagpasaka’g mga kaso batok Salic.
Giakusahan sa mga biktima si Salic nga nagsilbing bantay kanila kuyog ang laing sakop sa mga terorista aron dili sila maka-eskapo sa pagkadagit sa Brgy Sandab,Butig,Lanao del Sur niadtong petsa 4 sa Abril 2016.
Una niini,naputla’g ulo sa mga terorista sila Jaymart Capangpangan ug Salvador Janubas tungod sa ilang kasuko sa militar nga miatake sa kampo nila sa Butig.
Nasayran nga gitinguha usab sa Amerika nga ma-extradite si Salic kay financier suspek kini sa mipalpak nga pagpamomba sa teroristang ISIS sa NewYork City tuig 2016.
