CAGAYAN DE ORO CITY-Lisud-lisuron o isnaban sa konseho ang Cagayan de Oro Water District o COWD kon mangayo sila’g pagtugot sa usbaw sa bayronon sa tubig ning syudad.
Kini ang panganti ni Kag Bong Lao,chairman sa komitiba tungod sa pagka-insulto nga sulat lamang gikan sa COWD board of directors ang gitubag alang unta sa public hearing kagahapong adlawa.
Miingon si Lao nga katungod sa konseho isip representante sa katawhan sukwahi sa gipamugos sa COWD board of directors nga wala sila’y hurisdiksyon aron utingkayon ang nahitabo sulod sa ahensiya.
Samtang walay angayang ipasabot ang COWD board of directors atubangan sa konseho ilabina kon ang hisgutan ang pagtangtang kang Engr Rachel Beja isip ilang general manager.
Kini ang unod sa sulat-tubag sa COWD kon nganong wala sila mohatag panahon sa imbitasyon sa committee on public utilities sa konseho kagahapong adlawa.
Miingon si acting COWD General Manager Engr Beinvenido Batar Jr nga wala sa ilang intensyon nga dili tahuron ang konseho rason nagpadala sila’g sulat aron madunggan ang panig sa board of directors.
