CAGAYAN DE ORO CITY-Gihagit sa pamilyang Rotoras ang mga imbestigador nga dili katulgan ang pagsulbad sa kamatayon ni PASUC ug USTP Pres Dr Ricardo Rotoras ning syudad.
Kini human dismayado ang pamilya ni Rotoras sa padayong ka-inotil sa mga otoridad nga gitahasan pagsikop sa mastermind ug ubang kriminal sa kamatayon ni Rotoras.
Gi-kuwestiyon usab ni Eldie Rotoras ang pagpagawas sa SITG-Rotoras sa hulagway sa gipatoong testigo nga babaye apan walay natabang sa pagsulbad sa kaso.
Tungod sa palpak nga security intelligence bisan ubos sa Martial Law ang Mindanao,gipusil-patay si Rotoras mismo sa bisinidad sa ilang balay ning syudad Disyembre 2,2017.
Samtang giangkon sa SITG Rotoras nga naglisod sila’g pangita sa laing porma sa ebidensya aron hingpit masulbad ang kamatayon ni kanhi PASUC ug USTP Pres Ricardo Rotoras.
Miingon si Supt Mardi Hortillosa,tigpamaba sa Cagayan de Oro City Police Office o COCPO nga maoy nakalangan sa ilang investigating team ang pagpuga sa ubang witnesses ilabina nga maayo kaayo ang pagkatrabaho sa mga kriminal sa pagpatay kang Rotoras.
Gibutyag ni Hortillosa nga nabati nila ang kasubo sa pamilya sa biktima tungod kay dili lalim ang magpaabot sa dugang ebidensya alang sa kasulbaran sa misteryosong pagkamatay ni Rotoras.
