CAGAYAN DE ORO CITY-Dili mosugot ang konseho nga ipaubos sa pribadong pagdumala ang water distribution sa Cagayan de Oro Water District o COWD ning syudad.
Kini human unang gibulgar ni kanhi COWD General Manager Engr Rachel Beja nga nagtinguha ang Metro Pacific Water Consortium nga manginlabot sa pagdumala sa COWD subay sa pirmadong kontrata niini.
Miingon si Kag Bong Lao,chairman sa public utilities committee sa konseho nga nalatid sa kontrata nga gitugtan sa COWD nga moapil ang MetroPac sa pagpadagan sa water distribution sa syudad.
Kini ang hinungdan nga supakon nila ang maong lakang aron dili mahisama ang syudad sa kamahal sa tubig didto sa kauluhan.
Samtang,gipaniguro sa COWD nga dili apektado ang gitunol nila nga serbisyo sa mga konsumante ning syudad.
Kini bisan nga nag-atubang sa suliran ang liderato sa COWD diin gitangtang nila isip general manager.
Miingon si acting COWD General Manager Engr Beinvenido Batar Jr nga nagpabiling kontrolado sa management ang operasyon bisan nga adunay ‘faction’ sa mga empleyado tungod sa nahitabo kang Beja.
Una niini,kasuhan ni Beja ang board of directors tungod sa illegal termination nga gipahamtang batok kaniya.
