CAGAYAN DE ORO CITY- Gitambungan gikan sa nagkadiyang sekta sa pagtoo ang ecumenical station of the cross diha sa Gaston Park ning syudad kagahapon.
Kini isip pagpalawom sa pamalandong sa mga Kristohanon nga gipanguluhan sa simbahang Katolika.
Miingon si Msgr Rey Monsanto,consultor sa Archdiocese sa Cagayan de Oro nga sentro sa kalihukan ang panawagan nga makab-ot ang kahusay’g kalinaw sa Mindanao.
Kabahin sa mga miduyog ang relihiyosong Islam ingon man ang halos tanang Christian religious ning syudad ug lalawigan.
Samtang gikalipay sa Iglesia Filipina Independiente ang pag-imbitar kanila sa gilusad nga ecumenical station of the cross sa Gaston Park ning syudad kagahapong adlawa.
Gibutyag ni IFI Fr Dick Arellano nga gawas sa IFI,may mga representante usab gikan sa Methodist ug Protestant churches nga mitambong aron hiniusang mag-ampo alang sa kalinaw sa nasud.
Lakip sa ilang nahisgutan ang ugat-hinungdan sa pag-rebelde sa mga sakop sa NPA ug MILF nga dugay nang suliran sa nasud.
Wala usab palabya ang paghisgot sa epekto sa bag-ong gipatuman nga tax reform law ubos sa Duterte administration.
