CAGAYAN DE ORO CITY-Gipanganti ni Customs Commissioner Isidro Lapeña nga dugang mga empleyado nila ang
makasuhan tungod sa giingong kalambigitan sa illegal smuggling.
Gihimo ni Lapeña ang bahad tungod sa pagka- intercept sa siyam ka container vans nga unang ilegal nga gi-release ug nasapon sa Mindanao International Container Terminal o MICT sa Tagoloan,Misamis Oriental.
Miingon si Lapeña nga giandam na usab nila ang tukmang kaso batok sa consignee ug broker nga nagpalusot sa 16 milyon pesos nga smuggled imported goods nga gikan sa Thailand ug South Korea.
Una niini,gipangunaya’g abli ni Lapeña ang siyam ka container vans sa MICT diin nadiskobre ang asukal,sibuyas,mga sapatos ug ukay-ukay sa miaging semana.
Samtang,gipangguba aron dili na magamit ug mabaligya ang balor 3 milyon pesos nga ukay-ukay nga unang nabawi sa BoC sa MICT sa Tagoloan,Misamis Oriental.
Kini human madiskobre nga ilegal ang maong mga kargamento nga gikan gawas sa nasud ug tuyo unta ibaligya sa nagkadaiyang bahin dinhi sa rehiyon.
Miingon si Lapeña nga susama usab ang dangatan sa ubang mga kontrabando nga dili mahimong isubasta aron dili mabutang sa peligro ang panglawas sa katawhan.
