CAGAYAN DE ORO CITY – Gikalipay ni City Mayor Rolando ‘Klarex’ Uy nga milampos ang giingong nagsilbing water private petitioners aron kumbinsihon ang korte nga babagan ang kompanyang Metro Pacific Water -Cagayan de Oro Bulk Water Incorporated o MetroPac-COBI nga subli mamutol sa tubig-suplay sa dakbayan.
Kini human nakakuha sa writ of prelimintary injunction ang petitioners nunot sa pagdangop nila sa korte sa isyu sa panubig sa syudad.
Namahayag ang bag-ong tigpamaba ni Mayor Uy nga si Janboy Actub nga naghatag sa dakong kahupayan sa kabalaka sa katawhan ang gilugwa nga hukom sa korte.
Samtang gikataw-an lang sa panig sa kompanyang Metro Pacific Water -Cagayan de Oro Bulk Water Incorporated o MetroPac-COBI ang gipasiatab nga pabor nga nakuha sa water petitioners gikan sa korte batok kanila.
Kini human gipamugos sa petitioners nga milampos sila paghatag proteksyon sa katawhan batok sa posibleng mga pagputol pa sa tubig sa maong kompanya.
Gibarugan sa senior legal counsel sa MetroPac nga si Atty. Roberto Rodrigo nga nagsilbi nang pointless ang pagdangop sa korte sa petitioners kay wala na sila’y lakang nga subli moputol sa panubig sa COWD.
Samtang sa pikas bahin,masaligon si regular board of director Dr. Gerry Caño nga maputol na ang naghinobrang singil sa balayrunon sa tubig sa oras nga matuman ang ipatawag nga ‘unity meeting’ ubos sa inisyatiba sa Community Alliance on Water Security Action o CAWSA ug pag-uyon ni Cagayan de Oro Water District – Interim General Manager Fermin Jarales kuyog ang uban pang stakeholders sa syudad.
Miingon si Caño hinoon nga wala pa sila nakadawat sa kopya sa imbitasyon ni Jarales.
Apan kung hatagan sa tsansa nga makatambong ang regular COWD BoDs nga unang ipalanog niini ang pag-rekomendar sa MetroPac Waters-COBI nga pugngan ang ilang pagpakang sa tag-as nga water rates sa syudad, lakip na ang giingong ilegal nga pagpatong sa dagkong interes sa ilang singil rason nalubong sa utang ang COWD.
