CAGAYAN DE ORO CITY – Walay plano si Misamis Oriental Gov. Peter Unabia nga ibaligya ang Misamis Oriental General Comprehensive High School o MOGCHS ug ang sobra 7 ektaryang yuta nga gi-ukbukan niini nga makita sa dalang Don Apolinar Velez ning syudad.
Kini ang pagtin-aw ni Misamis Oriental 2nd District Board Member Gerardo Sabal III,chairman sa committee on education sa Sangguniang Panlalawigan kabahin sa isyu nga hayan sunod nga ipaubos sa joint venture agreement ang maong tunghaan.
Miingon si Sabal nga epekto lang kini sa kilid-kilid nga mga intriga ug walay basehan.
Kini tungod kay prioridad ni Unabia ang programang edukasyon sa lalawigan.
Siya miingon nga imposible kining hilabtan kay anaa diha ang 11-mil ka tinun-an diin sagad gikan pa sa syudad.
Dumduman nga ang MOGCHS,tinukod ni Velez sa tuig 1909 diin sobra usa ka siglo na ang paglihok niini ug saksi sa daghang mga panghitabo dinhi sa dakbayan.
Hisayrang kini ang pinakadako nga tunghaan sa hayeskul sa Northern Mindanao diin dinhi nang-graduwar ang daghang mga dagkong mga lideres sulod sa gobierno ug pribadong sector sa rehiyon
