CAGAYAN DE ORO CITY – Wala kalamti apan mihulom sa siyam ka gagmay’ng sapa aron ipalig-on pa ang pagtoong Kristiyanismo ni Cagayan de Oro City Police Director Col. Salvador Radam kuyog sa iyang hamili nga kapikas padulong sa Berhin sa Guadalupe nga nanukad sa Brgy Tablon ning syudad.
Kini gawas sa pagsusi sa kahugot sa seguridad nga gipatuman sa COCPO haom sa taas nga alerto alayon sa paghatag seguridad sa katawhan nga mitamod sa semana santa.
Nagtoo ang katawhan nga nakasaksi sa pagpanaad usab ni Radam nga gawas sa pagtuman sa obligasyong-ispirituwal, posibleng tuyo niya nga personal masinati niini ang bation sa usa ka deboto kuyog ang ubang namalandong ning semanaha.
Gitoohan usab nga ang pagtabok sa opisyal ang paagi sa pagsusi sa ilang mga tropa nga gipahimutang sa nagkada-iyang ‘station of the crosses’ pasaka sa Guadalupe Shrine.
Dumduman nga bisan si Police Regional Office 10 Director Brig Gen Jaysen de Guzman ang personal usab misukod sa kahugot sa seguridad sa nagkadaiyang simbahan ug pilgrimage sites nga naglakip sa Guadalupe ug bukid sa Malasag nga nakabase usab sa Brgy Cugman sa dakbayan.
Hisayrang anaa sa taas nga alerto ang Northern Mindanao ning semana santa tungod sa pagdagsa sa libuang mga deboto dili lang sa Cagayan de Oro City ingon man Misamis Oriental, Camiguin Province apan kutob sa adunay pilgrimage sites nga kadangpan sa katawhan sugod adlaw’ng Huwebes ug Biyernes Santo ning tuiga.
