CAGAYAN DE ORO CITY – Gipabuto sa kampo ni kanhi City Mayor Atty. Oscar Moreno ang nadiskobrehan nila nga impormasyon nga giingong naghinobra nga pagpalugwa ni City Mayor Rolando ‘Klarex’ Uy sa minilyong salapi sa panudlanan sa city hall pinaagi sa cash advances.
Kini human gibulgar ni kanhi city administrator Teddy Sabugaa nga anaa sa 330 milyones pesos nga pondo ang napagawas gamit ang pipila ka empleyado sa city hall pinaagi sa cash advances.
Giakusar sa kanhi administrasyon nga ang maong nalugwa nga minilyong pondo ang nawaldas sugod sa hinapos nga bahin sa tuig 2022 ug entrada usab sa kasamtangang 2025.
Nadiskobre usab sa ilang gihuptang mga dokumento nga adunay gigamit nga mga empleyado nga ika-20 ka higayon nakahimo’g cash advances samtang may indibidwal usab nahatagan sa sobra P71 milyones.
Gihisgot nila nga ang maong mga binuhatan ang dayag nga kasupakan sa Commission on Audit Circular number 07- 002 ug Government Procurement Law.
Kini ang rason nga gidangop ang maong isyu sa COA aron ipaubos sa imbestigasyon kung ensakto ba ang pasangil o nasubay sa balaod ang gipanghimo sa administrasyon.
Pagdumdom ni Sabugaa nga matag-peso nga gi-intrigo sa katawhan angayang maampingan rason nga haom lamang nga sihag ang pagdumala sa mga kalihukan sa dakbayan.
