CAGAYAN DE ORO CITY – Gihupay sa Cagayan de Oro City Police Office o COCPO ang gibating kabalaka sa publiko kabahin sa mando ni PNP chief Gen Nicolas Torre III nga padaghanon sa lower units ang pangdakpon niini nga suspected drug pushers sa palibot sa nasud.
Kini human gilayong nagpabati sa kahingawa ang Commission on Human Rights nga hayan daghan ang mabiktima sa abuso sa tawhanong katungod gumikan sa presyur sa Kampo Krame sa pagpangdakop sa mga tigpayuhot ug tigamitan sa illegal nga droga.
Miingon si Capt Emilita Simon,tigpamaba sa COCPO nga dili angayang mabalaka ang katawhan kay nakatutok niini ang korte ug hayan manubag pa ang mga pulis kung masuta nga adunay paghinobra sa paggamit sa puwersa.
Una nang gusto ni Torre nga dakpon nga mga buhi ug likayan nga mapatay sa operasyon ang mga personalidad nga walay pag-undang sa pagpayuhot sa illegal nga droga sa nasud.
