CAGAYAN DE ORO CITY – Nanganti si Dept of Agriculture Sec Francisco Laurel Jr kuyog ang Bureau of Customs nga gukdon aron makasuhan ang utok sa smuggling activities nga naglihok sa Northern Mindanao region.
Gihimo ni Laurel ang pahayag nunot sa pagkompiskar sa Customs sa container van nga kargado sa 25-mil kilos nga sibuyas nga nagkantidad sa 2-milyones pesos nga gikan sa Xiamen,China.
Nabulgar ang maong kontrabando subay sa intelligence monitoring sa Customs sa pagdunggo sa barko sa Phividec gikan China niadtong Mayo 28 ug gibuksan petsa 11 sa Hunyo ning tuiga.
Kini ang rason nga gi-abisuhan si Laurel kabahin sa maong illegal shipment diin nasuta nga unang gipatoo nga mga pansit ang karga apan mga sibuyas gikan Tsina.
Gitakdang gun-ubon o ipanghatag ang kargamento depende sa ihatag nga pagtugot sa mga hingtungdang ahenisya.
Kasong pagsupak sa Customs Modernization Act ang giandam nga kaso sa gobierno batok sa consignee sa maong kontrabando.
