CAGAYAN DE ORO CITY – Gipahupot sa Police Regional Office 10 sa mga lagsik ug himsog nga panglawas ang iyang mga pulis nga nakabase sa nagkadaiyang bahin sa Northern Mindanao region.
Kini human pasugdi’g balik ni PRO 10 regional director Brig Gen Rolindo Suguilon ang ‘Pulisteniks’ aron masunod ang sugo ni Philippine National Police Chief General Nicolas Torre III nga pagamyan ang mga tiyan sa mga pulis sa tuyo nga dili ngil-ad tan-awon atubangan sa publiko.
Namahayag si Suguilon nga dili kini paglisud-lisod sa mga pulis apan nag-unang tumong ni Torre niini nga lagsik ang panglawas ug dili mga masakiton.
Matud sa heneral nga pinaagi sa maong kalihukan,mamintinar sa mga pulis ang ilang stamina ug makatunol sa epektibo nga pagserbisyo nga puno sa disiplina sa mga trabaho.
Tipik usab kini sa basehan alang sa tinguha sa mga pulis nga magpa-promotar sa ilang mga ranggo sa umaabot panahon.
Hisayrang ang Pulisteniks,senemana nga buhaton sa mga pulis ubos sa PRO 10.
