CAGAYAN DE ORO CITY – Walay dinagko nga paglihok sa mga presyo sa mga batakang-produkto nga gipaubos sa kagamhanan sa ‘suggested retail price’/SRP sa Northern Mindanao region.
Kini bisan sa grabeng kahingaw sa international community nga naglakip sa Pilipinas sa panag-engkuwentro sa puwersang-militar sa Israel ug Iran sa Middle East.
Sa interbyu sa Bombo Radyo kang Department of Trade and Industry 10 spokesperson Julie Nieva Costales nga subay kini sa pasiunang mga impormasyon gikan sa ilang provincial offices nga nangunay paglusad sa inspeksyon.
Siya miingon nga maghulat pa sila sa dugang impormasyon gikan sa maong mga buhatan alang sa bag-ong mga ipahibalo nga mga kasayuran.
Giklaro usab niini nga mag-agad sila sa mga abiso gikan sa ilang buhatan-sentral kung pananglitan adunay mga dagko nga kausaban sa presyuhan sa prime-basic commodities sa katawhan.
Dumduman nga limitado lang ang mga produkto nga nasulod sa SRP.
Hisayrang kabahin sa dayag nga epekto sa bag-uhay pang nagka-ceasefire nga Israel ug Iran ang pagsaka sa presyo sa kada-bariles sa produktong petrolyo ug paghuyang usab sa kantidad sa peso kontra matag-US dollar sa trading sa kauluhan.
