CAGAYAN DE ORO CITY – Giklaro sa kampo ni Misamis Oriental Gov. Juliette Uy nga wala nila akusahi sa bisan unsa nga porma sa anomaliya apan obligasyon nila nga mohimo’g pakisusi sa mga dokumento sa kapitolyo-probinsyal nga gipanglubong sulod sa pasilidad sa Misamis Oriental Provincial Jail sa Initao ning lalawigan.
Miingon si Atty Angel Lim,provincial legal officer ni Uy nga wala kanila naggikan ang mga pasangil nga hayan adunay gitago ang kanhi administrasyon apan nagsumikad kini sa social media.
Siya miingon nga normal nga mohimo sila sa pagsuta sanglit sila ang nagsunod nga administrasyon nga mipadagan sa mga kalihukan sa gobiernong-probinsyal sa lalawigan.
Hisayrang miani sa nagkadaiyang reaksyon sa katawhan ang gibulgar nga paglabay ug paglubong sa mga basura sa MOPJ facility sa miaging gabii.
