CAGAYAN DE ORO CITY – Gi-depensa sa duha ka kongresista gikan sa magkalahing distrito sa syudad ug Misamis Oriental kung nganong gipaluyuhan nila nga subli mangulo sa kamarabaha si Leyte 1st District Cong. Martin Romualdez sa 20th Congress.
Kini human gikakurat sa mga taga-distrito 2 sa syudad nga mikuyog si Cong. Rufus Rodriguez sa mayoriya pinaagi sa pagbotar sa nominasyon ni Romualdez isip ilang subli mahimong speaker of the house.
Namahayag si Rodriguez nga lahi nga isyu ang wala niya pagbotar sa impeachment case batok Vice Pres Sara Duterte itandi sa pagpangulo ni Romualdez kanila sulod sa kamarabaha.
Sa Northern Mindanao,bugtong si Rodriguez lang ang wala mosuporta sa pag-impeach kang VP Sara apan sa nominasyon ni Romualdez,si Bukidnon 3rd District Cong. Audrey Zubiri usab ang nagbinugtong nga nag-abstain.
Sa pikas bahin, gusto ni Misamis Oriental 1st District Congresswoman Atty. Jennifer ”Karen” Lagbas nga makakuha’g igong suporta ang iyang mga priority bill ug mga nakahan-ay nga mga proyekto rason nga mikuyog siya sa sobra 200 ka kongresista nga nagsuporta kang Romualdez.
Kini ang tipik sa pagpasabot ni Lagbas batok sa mga misaway kaniya nga daw gitrayduran niya si Duterte nga nagpaluyo kaniya sa milabay’ng eleksyon.
Giila sa bag-ong kongresista ang dakong tabang sa Duterte supporters sa milabay’ng piliay apan lahi nga isyu ang liderato ni Romualdez sulod sa kamarabaha.
Hisayrang si Romualdez ang gitumbok nga utok sa pagpalagpot kang VP Sara gamit ang nagkadaiyang articles of impeachment nga gideklara nga unconstitutional sa korte suprema.