Gidala sa dalan ni AKBAYAN Partylist Representative Perci Cendaña ang pipila ka mga batan-on, kuyog ang grupong Tindig Pilipinas, aron ipadayag ang ilang hugtanong pagkondinar sa desisyon sa Senado nga i-archive ang impeachment complaint batok ni Vice President Sara Duterte. Gilusad ang indignation rally sa Boy Scout Circle sa Quezon City niadtong Agosto 7, nga gitambongan sa mga progresibong grupo sama sa Bagong Alyansang Makabayan, Federation of Free Workers, ug Kalipunan ng Kilusang Masa. Bitbit ang mga itom ug puti nga placards ug dagkong tarpulins, gipalanog sa mga demonstrador ang ilang “thumbs down” nga simbolo sa pagdisaprobar sa Senado. Ang maong simbolo unang gihimo sa grupo ni Kiko Dee sa hawanan sa Senado kagabii, human sa pagbotar sa 19 ka senador nga pabor sa pag-archive sa kaso.
Lakip sa gisiyagit sa grupo ang panawagan sa Korte Suprema nga ikonsiderar ang Motion for Reconsideration (MR) nga gipasa sa House of Representatives, nga nagtinguha nga ipadayon ang impeachment trial batok sa bise presidente. Giakusahan si VP Sara Duterte sa pagpanawkaw sa kapin ₱612 milyon nga confidential funds, nga gituohan nga gigamit sa dili klaro nga mga aktibidad. Sumala ni Rep. Cendaña, ang desisyon sa Senado ug sa Korte Suprema nagpalig-on sa kultura sa impunity ug nagluya sa sistema sa checks and balances sa gobyerno. Nanawagan siya sa House ug Senate nga ipakita ang ilang independensya ug gamiton ang tanang legal nga paagi aron mapadayon ang proseso sa impeachment.
Ang protesta gisuportahan sa daghang sektor, lakip na ang mga propesor sa UP College of Law nga nanawagan sa Senado nga dili talikdan ang ilang konstitusyonal nga katungdanan. Tulo ka retired Supreme Court justices, lakip na si Chief Justice Artemio Panganiban, mipahayag og kabalaka sa desisyon sa korte nga ilang giilaragway nga “judicial overreach” ug “rushed”. Ang Akbayan Partylist mipadayag nga ang Senado karon usa na ka “Senate of the Duterte” ug ang ilang desisyon usa ka “pagbaligya sa hustisya”. Gisaad sa grupo nga magpadayon sila sa pagpanawagan sa transparency, accountability, ug hustisya alang sa katawhan.
