Subo gitaho ni Senator Jinggoy Estrada sa plenaryo sa sesyon sa senado nga lisod na daw nga makalinggawas sa kasamtangang kahimtang sa panglawas si kanhi Senate President ug Presidential Chief Legal Counsel Atty. Juan Ponce Enrile.
Kini human gipalanog ni Estrada nga nadala sa wala panganli nga ospital si Enrile tungod sa nagka-grabeng sakit niya nga pulmonya.
Namahayag ang senador nga sa iyang nadunggan nga kasaligang kasayuran,nagka-nipis ang tsansa nga maluwas pa ang kinabuhi sa kanhi presidentee sa senado kinsa nasulod sa intensive care unit.
Si Enrile kinsa nagbaton sa tinood nga pangalan nga Juan Valentin Furagganan Ponce Enrile Sr ang nagsilbing saligado kaniadto ni late Pres Ferdinand Marcos Sr kinsa nagsilbing kalihim sa Department of Justice ug Defense Minister sa Pilipinas.
Dako kini’g papel dihang gipatuman ni Marcos ang martial law kay siya ang natahasan sa trabahong-militar sa pagpatuman niini.
Apan kabahin ra usab si Enrile kuyog ni late President Fidel Ramos nga misalikway kang Marcos Sr aron hingpit maputol ang balaod-militar ug nabalik ang demokrasya sa Pilipinas sa 1986 People Power Revolution I.
Sa pagsilbi niya nga politico, nagsilbi kining ika-21 nga presidentee sa Senado sugod 2008 -2023.
Nagsilbi si Enrile nga longest serving senator sa kasaysayan sa Pilipinas kay upat ka termino kini o 23 ka tuig sa senado.
Apan nabutang usab sa kontrobersya kay kabahin sa gipa-priso kaniadto tungod sa isyu sa P10-B pork barrel scam apan nakagawas sa panahon ni kanhi Pres Rodrigo Duterte ug nagsilbing presidential legal adviser ni Pres Bongbong Marcos hangtod sa kasamtangan.
Siya gitawag nga oldest living public servant sa kay nag-edad na kini sa 100 diin iyang ulahing pagsaulog sa adlaw’ng natawhan niadtong Pebrero 14, 1924.
