Nakaplastar na ang tanan nga sukdanan nga ipatuman sa Cagayan de Oro City Police Office (COCPO), kauban ang kasundaluan ug force multipliers sa matag barangay, alang sa mga lihok protesta sugod Nobyembre 29 sa syudad. Kini ang gibutyag ni Konsehal Roger Abaday, Chairman sa Committee on Police, Fire and Public Safety, human sa pinal nga coordination meeting nga nagtumong sa pagpanalipod sa kahapsay ug kalinaw sa duha ka kritikal nga adlaw. Sa interbyu sa Bombo Radyo, giingon ni Abaday nga ang unang aktibidad mao ang pro-Duterte rally nga ilusad sa Sabado, Nobyembre 29, nga usa ka political gathering. Sa ikaduhang adlaw, atol sa selebrasyon sa Bonifacio Day, ipahigayon ang Trillion Peso March 2.0 nga panguluhan sa religious groups, academe, labor sector, ug kabatan-onan sa managlahing lokasyon sa syudad. Gipangayo ni Abaday ug sa konseho sa dakbayan magmalinawon ang tanan kalihukan aron malikayan ang kagubot ug masiguro ang seguridad sa publiko
