Wala pa’y opisyal nga mando ang Department of Education sa rehiyon diyes kabahin sa posibleng pag-usab sa ilang mga palisiya, ilabi na sa pagpatuman sa classroom observation. Namahayag si DEP-ED Cagayan de Oro Program Head Romeo Aclo nga wala pa’y dokumento o opisyal nga impormasyon nga miabot gikan sa central office sa Department of Education. Apan, matod pa niya, kung aduna’y ipahigayon nga adjustment sa pamaagi sa classroom observations, dili gayud kini mawala, kay kung dili ipadayun, mawad-an og basihan ang trabaho sa mga principal kung wala’y klarong learning outcomes. Alang kang Aclo, normal ug importante ang classroom observations sa mga magtutudlo kay pinaagi niini masusi ang kalidad sa pagtudlo ug mahibal-an ang gikinahanglan pang kausaban aron mapalambo ang edukasyon.
