Mitala sa dul-an sa 36 ka mga fireworks-related injuries ang DOH Region 10 sa ilang tinuig nga Fireworks Injury Surveillance nga gipahigayon gikan Disyembre 21 hangtod Enero 6 ning tuiga. Gibutyag ni DOH Region 10 Epidemiology and Health Statistics Head Jasper Kent Ola nga kini nga mga kaso gikolekta gikan sa tanang reporting units nga gilangkoban sa mga rural health units ug 113 ka mga ospital sa tibuok rehiyon. Gipasabot ni Ola nga adunay 14.29 porsyentong nga pagkunhod sa mga insidente nga nabuthan sa tuig 2025 itande sa tuig 2024. Dugang pa sa opisyal nga kasagaran sa mga insidente natala sa Bukidnon nga adunay 14 ka kaso o 38 porsyento; gisundan sa Cagayan de Oro City nga adunay 7 ka kaso o 19.44 porsyento; ug tag lima ka kaso sa Misamis Oriental ug Misamis Occidental. Hisayran nga sa 36 ka mga kaso, 30 niini pulos mga lalaki nga nagpangidad gikan 4 anyos hangtod 60 anyos. Kadaghanan sa mga na-angol naka-angkon lamang sa mga paso ug bun-og, ug walay natala nga naputlan sa kumagko o laing parte sa lawas. Tungod sa mga insidente, mas gipakusgan sa DOH ang panawagan nga himoon nang balaod ang pagban sa legal ug ilegal nga mga pabuto, bisan pa sa existing ban sa ilegal nga pabuto. Dinhi sa rehiyon, anaa sa 20 ka mga kaso ang nabuthan sa ilegal nga pabuto
