Nanawagan ang Kabataan Partylist sa dayon ug walay kondisyon nga pagpagawas kang Chantal Anicoche, usa ka 24-anyos nga Filipino-American nga lider sa komunidad nga kasamtangang naa sa kustodiya sa militar. Nakit-an si Anicoche nga nagtago sa lungag sa Sitio Mamara, Barangay Cabacao, Abra de Ilog, Occidental Mindoro, 500 metros gikan sa lugar sa panagsangka tali sa tropa sa gobyerno ug NPA niadtong Enero 1. Giinsistir sa Kabataan Partylist nga dili miyembro si Chantal sa NPA, kondili usa lamang siya ka youth researcher sa Migrante International nga nagtan-aw sa kahimtang sa komunidad sa Mangyan. Nagbantay usab ang mga human rights group sa kondisyon ni Anicoche aron masiguro nga luwas siya ug mabalik sa iyang pamilya. (JANE ABULAG)
