Nagpahimango ang City Price Coordinating Council o CPCC sa tanang market vendors sa Cogon nga sundon gayud ang mga abiso ug patakaran sa lokal nga kagamhanan.
Sumala kang CPCC Chairperson, Atty. Egay Uy, sa iyang interbyu sa Bombo Radyo, dili na unta paaboton sa mga vendors nga masuspenso ang ilang pagpamaligya, ilabi na sa mga lugar o dalan nga gitugotan silang mamaligya.
Butyag ni Uy, nahimo nang pahimangno ug reminder sa tanang vendors ang temporaryong suspensyon sa pagpamaligya sa pipila ka market vendors sa Daumar Street ning syudad, human matikdan ang ilang paglapas sa mga patakaran sa lokal nga kagamhanan.
Lakip sa mga nalapas nga patakaran ang dili husto nga pagdumala sa basura, pagpangasaba sa mga collectors panahon sa koleksyon, ug paglapas sa gitakdang oras sa pagpamaligya, nga hinungdan sa grabe nga trapiko sa maong lugar.
Matod pa ni Uy, naghinaot ang lokal nga kagamhanan nga mahimong leksyon kini sa tanang vendors, ug musunod sila sa mga giya nga ihatag aron malikayan ang kasamok ug disgrasya sa trapiko.
Gipatin-aw usab ni Uy nga dili magduha-duha ang lokal nga kagamhanan sa pagpahamtang og suspensyon, kon ang pagpaninda sa pipila ka vendors makahatag na og kasamok ug makadaut sa hapsay nga dagan sa trapiko, bisan pa og adunay ubang vendors nga matarong ug mosunod sa patakaran
