Gipistahan sa social media netizens ang pagtandi sa duha ka tigpamaba gikan sa managlahi nga buhatan sa nasudnong gobierno nga gi-representahan ni Atty.Claire Castro nga ubos sa Palace Press Office nga nasakop sa Malakanyang ug Atty. Camille Sue Mae Ting gikan sa Korte Suprema.
Kini human subling nakit-an sa publiko si Camille nga nagpahibalo sa hiniusang hukom sa 13 ka mahistrado sa Korte Suprema nga pabiling deklarado nga supak sa konstitusyon ang gisubay nga proseso sa Kongreso nga pagpalagpot sa katungdanan kang Vice Pres. Sara Duterte sa miaging tuig.
Daghan ang nakabantay sa kalmado ug pinahiluna nga pag-presentar ni Camille sa SC en banc resolution ug bisan pagtubag sa mga pangutana sa media dihang gipahibalo niini ang pagpalig-on sa hukom ug gibasura ang apelar sa Kongreso batok VP Sara.
Nagsulti ang social media netizens nga mas masabtan ug adunay makuha nga tukmang mga impormasyon sa mga isyu nga gituki sa SC kung si Camille ang mangatubang sa publiko.
Kini tungod kay matandi nila ang istilo usab sa dinal-an ug tinubagan ni Castro sa matag-media briefing niini sulod sa Malakanyang diin nag-sentro sa pag-depensa sa administrasyon ni Pres. Bongbong Marcos.
Gibutyag usab sa ubang socmed users nga managsama nga nag-trabaho lang sila Ting ug Castro sa ilang gidala nga tagsa-tagsa ka opisina nga gi-representahan.
Nagsagol nga pagdayeg ug adunay mga komedyang komento ang gipalanog sa mga miangay ingon man gisamukan tali sa duha ka pulos nga babaye nga tigpamaba gikan sa ehekutibo ug hudikatura.
Si Camille,abogada nga second honors gikan sa Ateneo de Manila University apan unang nagkuha sa duha ka kurso sa Bachelor of Arts major sa Philosophy;Bachelor of Science in Commerce degree major in Legal Management.
Nag-masters sa Philosophical Research ug Master of Laws sa London School of Economics.
Ayha nahimong tigpamaba sugod Abril 16,2024,11 ka tuig usab kini nga nagsilbing news analyst sa SC Public Information Office.
Sa pikas bahin, si Castro ang gikan sa usab sa University of Sto Tomas nga nakahuman sa kursong abogasiya nga ‘cum laude.’
Nagbaton usab sa masters of law si Castro rason nga wala magduha-duha pagkuha si Marcos kaniya isip tigpamaba sa Malakanyang.
Nabantog si Castro nga ‘most hated mouthpiece’ tungod sa iyang mga tahas pagpaabot impormasyon ug pag-depensa sa mga isyu nga giatubang sa administrasyong Marcos.
