CAGAYAN DE ORO CITY – Anaa sa maayong kondisyon ang nag-trending nga kabayo nga si Kabang.
Kini ang gihatag nga katin-awan sa tag-iya nga si Jose Castro pinaagi sa iyang Facebook post sukwahi sa mikatag nga tsismis nga namatay ang maong kabayo.
Gihimo ni Castro ang pagtin-aw nunot sa nagpungasi nga mga komento social media netizens nga mibati’g kalooy sa kabayo ug nagbatikos usab ngadto sa tag-iya.
Unang gitoohan sa netizens nga gipaguyod sa tag-iya ang iyang kabayo sa sakyanan samtang sila mihimo sa pagsubay sa Gingoog City-Claveria highway sa Misamis Oriental.
Siya miingon nga wala gipaguyod ang iyang kabayo apan ‘guided ug monitored’ kini nga lihok.
Dugang niya nga nagsilbing giya lang ang sakyanan samtang gipaubos sa controlled training ang kabayo.
Depensa usab niini nga normal nga milubog ang kabayo kay aron makapahulay.
Gilakbit usab ni Castro nga iyang kabayo nga si Kabang nga nahimugso niadtong Hulyo 17,2022 gikan sa breeding nga pure thoroughbred ug misteza native-quarter nga ginikanan.
Gidasig usab niini ang mga konohay animal lover nga mas maayo modalikyat sa bulangan kay atua didto ang tinud-anay nga ‘animal cruelty.
