Personal nga gibisita ni Department of Social Welfare and Development (DSWD) Secretary Rex Gatchalian ang duha ka dagkung LGU’s sa Northern Mindanao nga grabeng naapektuhan sa Bagyong Basyang. Namahayag si Rosheil Galla, Regional Public Information Officer sa DWSD-10 nga unang nahimamat ni Secretary Gatchalian si Iligan City Mayor Frederick Siao ug nasaksihan ang kadaku sa damyos nga nahiaguma sa syudad sa naglabay nga bagyo. Human sa Iligan, gilayong mibisita ang kalihim sa opisina ni City Mayor Klarex Uy, sa Cagayan de Oro human nakadawat sa report nga aduna’y 4 ka tawo patay sa landslide sa Brgy Agusan.
Mingon usab si Galla nga gipangutana ni Gatchalian ang duha ka mayor kung unsa ang ilang dugang panginahanglan ug gipadali ang pag profiling sa mga biktima sa baha nga gilangkoban sa mga displaced families nga anaa sa evacuation centers ug mga pamilyang nagpabilin sa ilang puy-an bisan nalunupan.
Sa pagkutlo ning balita anaa sa 15,000 ka pamilya ang apektado sa bagyo sa Iligan, kundiin mulangkob kini sa kapin 24,000 ka mga indibidwal. Gitin-aw sa ahensya nga may taas nga tsansa nga musaka pa ang ihap sa mga bahaan tungod kay nagpadayon pa ang profiling sa mga home-based nga mga biktima. Anaa pa sa kapin 6,000 ka mga pamilya ang padayong girasyonan sa pagkaon sa City-LGU ug DSWD ning adlawa, kay wala pa silay kapuy-an nga panimalay human nabanlas sa baha.
